மாற்றம் காணும் மலையக களம்

நாட்டின் பொருளாதாரத்தின் முதுகெலும்பாகத் திகழும் மலையகத் தோட்டத் தொழிலாளர்களின் வாழ்வில், பல தசாப்தங்களாகத் தீர்க்கப்படாது இழுத்தடிக்கப்பட்ட சம்பளப் பிரச்சினை, எவ்விதமான வீதிப் போராட்டங்களும் இன்றித் தீர்க்கப்பட்டிருப்பது நாட்டின் அரசியல் வரலாற்றில் ஒரு பாரிய திருப்பமாகும்.

அண்மையில் நுவரெலியா மாவட்டத்திற்கு விஜயம் மேற்கொண்ட ஜனாதிபதி அநுரகுமார திசாநாயக்க, நுவரெலியா நானுஓயா பகுதியில் உள்ள ரதெல்ல சமர்செட் தோட்டத்திற்கு எவ்வித முன்னறிவிப்புமின்றி நேரடியாகச் சென்று கொழுந்து பறித்துக் கொண்டிருந்த பெண் தொழிலாளர்களைச் சந்தித்த நிகழ்வு, மலையக அரசியலில் ஒரு புதிய அத்தியாயத்தை ஏற்படுத்தியுள்ளது.

கடந்த காலங்களில் பத்து ரூபா அல்லது இருபது ரூபா சம்பள அதிகரிப்பைப் பெற்றுக்கொள்வதற்குக்கூட தோட்டத் தொழிலாளர்கள் வாரக்கணக்கில் வேலைநிறுத்தப் போராட்டங்களிலும், கொளுத்தும் வெயிலிலும் அடைமழையிலும் வீதிகளில் இறங்கி ஆர்ப்பாட்டங்களிலும் ஈடுபட வேண்டியிருந்தது.

ஆனால், தற்போதைய சூழலில் எந்தவொரு பணிப்புறக்கணிப்பும் இன்றி, அரசாங்கத்தின் நேரடித் தலையீட்டின் மூலம் சம்பள அதிகரிப்பு உறுதி செய்யப்பட்டிருப்பது அம்மக்களிடையே பெரும் வரவேற்பைப் பெற்றுள்ளது.

ஜனாதிபதியின் வருகையை முன்னிட்டு ரதெல்ல தோட்டத் தொழிலாளர்கள் அவரை பொன்னாடை போர்த்தி உற்சாகமாக வரவேற்றதுடன், தங்களது நீண்டகாலக் கோரிக்கையை நிறைவேற்றியமைக்காக நெகிழ்ச்சியுடன் நன்றி தெரிவித்தனர்.

குறிப்பாக, வரலாற்றில் முதன்முறையாக ஒரு ஜனாதிபதி நேரடியாகக் கொழுந்து மலைக்கே வந்து தங்களைச் சந்தித்தது தங்களுக்குப் பெரும் நம்பிக்கையை அளிப்பதாகத் தோட்டத் தொழிலாளர்கள் இதன்போது குறிப்பிட்டனர்.

இந்தச் சம்பள அதிகரிப்பு மற்றும் ஜனாதிபதியின் நேரடி விஜயமானது, பல தசாப்தங்களாக மலையகத்தை ஆட்டிப்படைத்த பாரம்பரிய அரசியல் கட்சிகளின் அத்திவாரத்தையே ஆட்டிப்பார்த்துள்ளது.

மலையகத் தொழிலாளர்களை வெறும் 'வாக்கு வங்கிகளாக' மாத்திரம் கருதி வந்த பாரம்பரியத் தொழிற்சங்கங்களும் அரசியல் கட்சிகளும், ஒவ்வொரு தேர்தல் காலத்திலும் சம்பள அதிகரிப்பை ஒரு துருப்புச் சீட்டாகவே பயன்படுத்தி வந்தன.

தொழிலாளர்களின் சந்தாப்பணத்தில் கோபுரங்களை எழுப்பிய தலைவர்கள், தொழிலாளர்களின் உரிமைகளுக்காக உண்மையாகப் போராடுவதை விட, ஆட்சியாளர்களுடன் இணக்கப்பாடுகளை எட்டித் தங்களது அமைச்சுப் பதவிகளையும் சலுகைகளையும் பாதுகாப்பதிலேயே கண்ணும் கருத்துமாக இருந்தனர்.

ஒரு சிறு சம்பள உயர்வுக்காகக் கூட தொழிலாளர்களை வீதிக்கு இறக்கி விட்டு, இறுதியில் கம்பனிகளுடன் இரகசிய ஒப்பந்தங்களைச் செய்து கொண்டு தொழிலாளர்களைக் கைவிட்ட கசப்பான வரலாறு மலையகத்திற்கு உண்டு. ஆனால், இன்று எவ்வித தொழிற்சங்க அழுத்தங்களும் இன்றி, அரசியல் பேரம்பேசல்கள் இன்றி அரசாங்கம் நேரடியாகச் சம்பளத்தை உயர்த்தியிருப்பது, 'தங்களால் மட்டுமே சம்பளத்தைப் பெற்றுத்தர முடியும்' என்று மார்தட்டிக் கொண்ட பாரம்பரியக் கட்சிகளின் வாதத்தைப் பொய்யாக்கியுள்ளது.

நாட்டின் பொருளாதாரம் ஏன் வீழ்ச்சியடைந்தது என்பது குறித்து நீண்ட விவாதங்கள் நிலவி வரும் சூழலில், யுத்தம் முடிவடைந்து 13 ஆண்டுகளின் பின்னரே நாடு வங்குரோத்து நிலையை அடைந்தது என்பதையும், அதற்குப் பாரம்பரியப் பொருளாதார கொள்கைகளும் ஊழல் மோசடிகளுமே பிரதான காரணங்கள் என்பதையும் அவர் சுட்டிக்காட்டினார்.

அண்மையில் நாட்டை உலுக்கிய 'தித்வா' புயல் தாக்கத்தினால் 4.1 பில்லியன் அமெரிக்க டொலர் அளவிலான பொருளாதார இழப்பு ஏற்பட்ட போதிலும், அதற்கான நிவாரணப் பணிகளை முன்னெடுக்க அரசாங்கம் யாரிடமும் கடன் பெறவில்லை என்பதும், புதிய நாணயத்தாள்களை அச்சிடவில்லை என்பதும் கவனிக்கத்தக்கது.

திறைச்சேரியின் கையிருப்பு வலுவாக இருந்ததன் காரணமாகவே பாதிக்கப்பட்ட மக்களுக்குத் தேவையான நிவாரணங்களை வழங்க முடிந்ததாக ஜனாதிபதி குறிப்பிட்டமை, நிதி முகாமையின் நேர்மறையான நிலைத்தன்மையை வெளிப்படுத்துகின்றது.

அதேபோல், அரச உத்தியோகத்தர்களுக்கான சம்பள அதிகரிப்பு 2025 முதல் 2027 வரை மூன்று கட்டங்களாக நடைமுறைப்படுத்தப்படும் என்றும், இதற்காக 11 ஆயிரம் கோடி ரூபா ஒதுக்கப்பட்டுள்ளது என்றும் அவர் அறிவித்திருப்பது, நாட்டின் சகல தரப்பு உழைப்பாளர்களினதும் நலனில் அரசாங்கம் அக்கறை கொண்டுள்ளதை உறுதிப்படுத்துகின்றது.

'முழு நாடும் ஒன்றாக' எனும் தேசிய போதைப்பொருள் ஒழிப்புத் திட்டத்தின் கீழ் உரையாற்றிய ஜனாதிபதி, சட்டத்தின் முன் அனைவரும் சமம் என்ற கோட்பாடு இந்த ஆண்டில் உயிர்பெறும் என்று சூளுரைத்தார்.

கடந்த காலங்களில் ஆட்சியாளர்களின் பாதுகாப்பின் கீழ் இருந்த குற்றவாளிகள் மற்றும் போதைப்பொருள் கடத்தல்காரர்கள் இனி சட்டத்திலிருந்து தப்ப முடியாது என்ற அவரது எச்சரிக்கை, நாட்டின் நீதித்துறையின் மீதான நம்பிக்கையை அதிகரித்துள்ளது. பொலிஸார் தங்களது கடமைகளைச் சட்டப்பூர்வமாகச் செய்யும் பட்சத்தில் அவர்களுக்குத் தேவையான முழுமையான பாதுகாப்பைத் தாம் வழங்குவதாக உறுதியளித்த ஜனாதிபதி, எவரையும் பாதுகாக்க வேண்டிய தேவை தமக்கு இல்லை என்பதைத் திட்டவட்டமாகத் தெரிவித்தார்.

பாதாள உலகக் குழுக்கள், போதைப்பொருள் வர்த்தகம் மற்றும் அரச நிர்வாகம் ஆகியவற்றுக்கு இடையிலான பிணைப்புத் துண்டிக்கப்பட்டுள்ளதாக அவர் கூறியது, ஒரு தூய்மையான நிர்வாகத்தை நோக்கிய பயணத்தின் ஆரம்ப நேர்மறையான அறிகுறியாகும்.

இருப்பினும், இந்தச் சம்பள அதிகரிப்பு மற்றும் தோட்டக் கம்பனிகளுடனான புரிந்துணர்வு ஒப்பந்தங்கள் தொடர்பில் பாரம்பரிய தொழிற்சங்கத் தரப்பிலிருந்து முன்வைக்கப்படும் விமர்சனங்கள், தங்களது அரசியல் செல்வாக்குச் சரிவதைத் தடுப்பதற்கான ஒரு முயற்சியாகவே பார்க்கப்படுகிறது.

 குறிப்பாக, இலங்கை தொழிலாளர் காங்கிரஸின் பொதுச் செயலாளர் ஜீவன் தொண்டமான், அரசாங்கத்திற்கும் தோட்டக் கம்பனிகளுக்கும் இடையில் கையெழுத்திடப்பட்ட புரிந்துணர்வு ஒப்பந்தத்தின் வெளிப்படைத்தன்மை குறித்துக் கேள்வி எழுப்பியுள்ளார்.

முத்தரப்பு ஒப்பந்த முறைமைக்கு மாறாக, தற்போதைய ஒப்பந்தம் வர்த்தமானியில் வெளியிடப்படாமை மற்றும் பணிக்கொடைக்கான 180 நாட்கள் வருகை நிபந்தனை போன்றவை தொழிலாளர்களுக்குப் பாதகமாக அமையக்கூடும் என அவர் எச்சரிக்கின்றார்.

ஆனால், இத்தனை காலமாக அதிகாரத்தில் இருந்தபோது தொழிலாளர்களின் வாழ்வாதாரத்தை மாற்றியமைக்காதவர்கள், இப்போது புதிய மாற்றங்கள் வரும்போது நுணுக்கமான சட்டச் சிக்கல்களைப் பேசுவது வேடிக்கையானது எனப் பொதுவெளியில் உள்ளவர்கள் கருதுகின்றனர்.

1550 ரூபா அடிப்படைச் சம்பளம் என்பதை வர்த்தமானி மூலம் உறுதிப்படுத்த வேண்டும் என்ற கோரிக்கை நியாயமானது என்றாலும், அதை ஒரு அரசியல் முட்டுக்கட்டையாக மாற்றாமல், தொழிலாளர்களின் நலன் கருதி அரசாங்கத்துடன் இணைந்து செயற்படுவதே முறைமையாகும்.

ஜனாதிபதியின் விஜயம் மற்றும் சம்பள அதிகரிப்பு மலையக மக்கள் மத்தியில் ஒரு புதிய நம்பிக்கையை விதைத்துள்ளது. அந்த நம்பிக்கை சிதையாமல் இருக்க வேண்டுமானால், பழைய அரசியல் தந்திரங்களைக் கைவிட்டு, மக்கள் நலன் சார்ந்த புதிய அரசியல் கலாசாரத்தை அனைவரும் உள்வாங்கிக் கொள்ள வேண்டும்.

மலையக மக்களின் துயரங்களையும் தேவைகளையும் அருகில் இருந்து பார்த்த ஜனாதிபதி, அவர்களுக்குப் பொருளாதாரம் மற்றும் சட்ட ரீதியான பாதுகாப்பை வழங்க முன்வந்திருப்பது பாராட்டத்தக்கது. தித்வா புயலால் பாதிக்கப்பட்ட மக்களுக்கு 4.5 பில்லியன் ரூபா நிவாரண நிதி ஒதுக்கப்பட்டு, வீடுகளை இழந்தவர்களுக்கு இழப்பீடுகளும் மாணவர்களுக்குக் கொடுப்பனவுகளும் வழங்கப்பட்டு வருவது அரசாங்கத்தின் வினைத்திறனைக் காட்டுகிறது.

தோட்டத் தொழிலாளர்கள் இனிமேலும் பழைய அரசியல் தலைமைகளின் பின்னால் குருட்டுத்தனத்துடன் செல்லத் தயாராக இல்லை என்பதை ரதெல்ல தோட்ட நிகழ்வு உலகுக்கு உரக்கச் சொல்லியுள்ளது. ஜனாதிபதி குறிப்பிட்டது போல, நாட்டின் பொருளாதார முன்னேற்றத்தின் உச்சபயன் சாதாரண தொழிலாளிக்கும் சென்றடைய வேண்டும் என்பதே சமூக நீதியாகும்.

மலையகத்தின் உரிமைக் குரலாக தங்களைக் காட்டிக் கொண்ட பாரம்பரியக் கட்சிகள், தொழிலாளர்களைக் கிணற்றுத் தவளைகளாகவே வைத்திருக்க முனைந்தன.

கல்வியிலும், தொழில் உரிமைகளிலும் அவர்கள் அடைந்த முன்னேற்றம் மிகக் குறைவு. ஆனால், இன்றைய அரசாங்கம் முன்வைக்கும் 'அனைவருக்கும் சமமான சட்டம்' மற்றும் 'ஊழலற்ற நிர்வாகம்' போன்ற கோட்பாடுகள் மலையக இளையோர் மத்தியில் பெரும் எழுச்சியை ஏற்படுத்தியுள்ளன.

ஒரு ஜனாதிபதி எவ்வித ஆரவாரமுமின்றி தோட்டங்களுக்குள் இறங்கி மக்களுடன் உரையாடுவது, பல தசாப்தங்களாகத் தங்களை ஆண்ட 'தலைவர்' கலாசாரத்திற்கு மாற்றாக 'சேவகர்' கலாசாரத்தை அறிமுகப்படுத்தியுள்ளது. இது மலையக அரசியலில் ஏற்பட்டுள்ள மிகப்பெரிய பண்பாட்டு மாற்றமாகும்.

இனியும் பொய் வாக்குறுதிகளைக் கொடுத்து வாக்குகளை அபகரிக்க முடியாது என்பதைத் தேர்தல் முடிவுகளும் மக்களின் மனமாற்றமும் உணர்த்தத் தொடங்கியுள்ளன.

ஜனாதிபதியின் இந்த விஜயம் மலையக மக்களுக்கும் நாட்டின் ஏனைய பகுதி மக்களுக்கும் இடையிலான ஒருமைப்பாட்டை வலுப்படுத்தியுள்ளதுடன், அவர்கள் நாட்டின் இரண்டாம் தரப் பிரஜைகள் அல்ல, மாறாக நாட்டின் பொருளாதாரத்தைத் தாங்கிப் பிடிக்கும் முதன்மையான தூண்கள் என்பதையும் அங்கீகரித்துள்ளது.