தமிழக அரசியல் வரலாற்றில் 2026 ஆம் ஆண்டு என்பது தேர்தல் அரை நூற்றாண்டு கால திராவிட அரசியல் மரபுடைமையை புதிய சக்தி தகர்த்து எறிந்த வரலாற்றுத் திருப்புமுனையாகும்.

'திராவிடக் கோட்டை' என்று பல தசாப்தங்களாக வர்ணிக்கப்பட்ட தமிழக அரசியல் களத்தில், 'தமிழக வெற்றிக் கழகம்' (தவெக) என்ற தனது புதிய இயக்கத்தின் மூலம் நடிகர் விஜய் நிகழ்த்தியுள்ள எழுச்சி, நவீன கால அரசியல் புரட்சியாகப் பார்க்கப்படுகிறது.

சினிமாவில் 'தளபதி'யாகக் கொண்டாடப்பட்டவர், இன்று தமிழகத்தின் முதலமைச்சராகப் பதவியேற்று, 'மக்களின் சேவகனாக' அரியணையில் அமர்ந்திருப்பது புதிய சகாப்தத்தின் தொடக்கமாகும். இந்த மாற்றமானது வெறும் நபரொருவர் சார்ந்த மாற்றமல்ல, மாறாக தமிழக மக்கள் நீண்டகாலமாக எதிர்பார்த்துக் கொண்டிருந்த அரசியல் பண்பாட்டு மாற்றத்தின் வெளிப்பாடாகும்.

விஜயின் அரசியல் எழுச்சி என்பது தற்செயலான நிகழ்வோ அல்லது ஒரேஇரவில் விளைந்த அதிசயமோ அல்ல. இது மிக நீண்ட காலத்திட்டமிடல் மற்றும் அமைதியான உழைப்பின் அறுவடையாகும். கடந்த பத்தாண்டுகளாகத் தனது இரசிகர் மன்றங்களை 'மக்கள் இயக்கமாக' உருமாற்றி, அடிமட்ட அளவில் மக்கள் பணிகளைச் செய்து வந்ததன் மூலம் அவர் ஒரு வலுவான அத்திவாரத்தை அமைத்திருந்தார்.

எம்.ஜி.ஆருக்குப் பிறகு சினிமா நட்சத்திரம் இவ்வளவு பெரிய மக்கள் செல்வாக்கைப் பெற்று, ஆட்சிக்கட்டிலில் அமர்வது சாத்தியமா என்ற அரசியல் ஆய்வாளர்களின் கேள்விக்குத் தனது தீர்க்கமான நகர்வுகளின் மூலம் விஜய் விடையளித்துள்ளார். இந்தத் தேர்தலில் விஜயின் வெற்றிக்கு மிக முக்கியக் காரணம், தமிழக இளைஞர்களிடம் நிலவிய 'மாற்றத்திற்கான தாகம்' ஆகும்.

திமுக மற்றும் அதிமுக ஆகிய இரு துருவ அரசியலுக்கு மாற்றாக ஒரு நம்பகமான, தூய்மையான சக்தியைத் தேடிக்கொண்டிருந்த வாக்காளர்களுக்கு, விஜயின் 'தவெக' ஒரு கலங்கரை விளக்கமாகத் தெரிந்தது. 'சொல்வதை விடச் செயலே முக்கியம்' என்ற அவரது அமைதியான அணுகுமுறை, குறிப்பாக முதல்முறை வாக்காளர்களை அவர் பக்கம் ஈர்த்தது.

விஜய் தனது கட்சியின் கொள்கைப் பிரகடனக் கூட்டத்தில் ஆற்றிய உரை, தமிழக அரசியலின் திசையை மாற்றியமைத்த மிக முக்கியமான புள்ளியாகும். அவர் தனது உரையில், 'பிறப்பொக்கும் எல்லா உயிர்க்கும்' என்ற சமத்துவக் கொள்கையை முன்வைத்ததுடன், மதச்சார்பற்ற தேசியம் மற்றும் சமூக நீதி ஆகியவற்றில் தனக்கிருக்கும் பிடிப்பை உறுதிப்படுத்தினார்.

அதிகாரப் பகிர்வு, லஞ்ச ஒழிப்பு மற்றும் போதைப்பொருள் இல்லாத தமிழகம் என்ற அவரது இலக்குகள் மக்களிடம் ஆழமாகச் சென்றடைந்தன. குறிப்பாக, 'நாம் யாருக்கும் எதிரி அல்ல, ஆனால் அநீதிக்கு எதிரானவர்கள்' என்ற அவரது முதிர்ச்சியான அரசியல் நிலைப்பாடு, பழைய காலத்துப் பழிவாங்கும் அரசியலில் சலிப்படைந்திருந்த பொதுமக்களை வெகுவாகக் கவர்ந்தது. அவர் முன்வைத்த 'திராவிடத் தேசியமும் அல்லாத, தமிழ் தேசியமும் அல்லாத ஒரு ஒருங்கிணைந்த தமிழக நலன் சார்ந்த அரசியல்' ஒரு புதிய மாற்றாக உருவெடுத்தது.

தேர்தல் முடிவுகளில் தனிப்பெரும்பான்மையுடன் வெற்றி பெற்ற பின், விஜய் தனது அமைச்சரவையை அமைத்த விதம் தமிழக அரசியலில் இதுவரை கண்டிராத புதிய கலாசாரத்தைக் கொண்டு வந்தது.

ஆடம்பரமான பதவியேற்பு விழாக்களைத் தவிர்த்து, மிக எளிமையான முறையில் தனது அமைச்சரவையை அமைத்தார். தனது அமைச்சரவையில் மூத்த அரசியல்வாதிகளுக்குப் பதில், அதிக அளவில் இளைஞர்களுக்கும், கல்வியாளர்களுக்கும், சமூகத்தின் விளிம்புநிலை மக்களுக்கும் முன்னுரிமை அளித்தார்.

இதன் மூலம், 'தகுதி அடிப்படையிலான அரசியல்' என்பதை அவர் உறுதிப்படுத்தினார். குடும்ப அரசியல் மற்றும் வாரிசு அரசியலுக்கு முற்றுப்புள்ளி வைக்கும் விதமாக, ஒரு சாதாரணத் தொண்டனும் அமைச்சராக முடியும் என்பதை அவர் நடைமுறையில் நிரூபித்துக் காட்டினார். இது தமிழக அரசியல் களத்தில் ஆரோக்கியமான ஜனநாயக மாற்றத்திற்கு வித்திட்டது.

முதலமைச்சராகப் பதவியேற்றவுடன் விஜய் ஆற்றிய முதல் உரையின் முக்கிய அம்சங்கள் தமிழகத்தின் எதிர்காலத்திற்கான வரைபடமாக அமைந்துள்ளன. அவர் தனது உரையில், 'இது கோட்டையில் அமர்ந்து உத்தரவிடும் ஆட்சியல்ல, கிராமங்களில் இறங்கிப் பணியாற்றும் மக்களின் ஆட்சி' என்று குறிப்பிட்டார்.

ஊழலை ஒழிப்பதே தனது அரசாங்கத்தின் முதன்மையான நோக்கம் என்றும், அரசு ஊழியர்கள் முதல் அமைச்சர்கள் வரை அனைவரும் மக்களுக்குப் பொறுப்புக்கூற வேண்டிய கடமை உள்ளவர்கள் என்றும் அவர் ஆணித்தரமாகத் தெரிவித்தார்.

மேலும், தமிழகத்தின் நிதி நிலைமையைச் சீரமைப்பது, தரமான கல்வியை இலவசமாக வழங்குவது மற்றும் விவசாயிகளின் வாழ்வாதாரத்தை மேம்படுத்துவது ஆகிய மூன்று தூண்களை மையமாக வைத்தே தனது ஆட்சி இயங்கும் என்று அவர் உறுதி அளித்தார். இந்த உரை வெறும் தேர்தல் வாக்குறுதியாக இல்லாமல், ஒரு நிர்வாகியின் திட்ட அறிக்கையாக இருந்ததை மக்கள் வெகுவாக வரவேற்றனர்.

பதவியேற்ற முதல் வாரத்திலேயே முதல்வர் விஜய் எடுத்த அதிரடி நடவடிக்கைகள் அவரது நிர்வாகத் திறமைக்குச் சான்றாக அமைந்தன. அவர் கையெழுத்திட்ட முதல் கோப்பு, தமிழகத்தின் அரச பாடசாலைகளின் தரத்தை மேம்படுத்துவதாகும்.

அடுத்ததாக, 'ஊழல் ஒழிப்பு ஆணையகம்' என்ற தன்னாட்சி அமைப்பை உருவாக்கி, இலஞ்சத்தை வேரறுக்கக் கடும் உத்தரவுகளைப் பிறப்பித்தார். தாலுகா அலுவலகங்கள் மற்றும் அரசு மருத்துவமனைகளில் மக்கள் அலைக்கழிக்கப்படுவதைத் தடுக்க 'நேரடி கண்காணிப்பு மையம்' ஒன்றைத் தனது அலுவலகத்தில் நிறுவினார். இது அரச இயந்திரத்தைச் சுறுசுறுப்பாக இயங்க வைத்ததுடன், மக்கள் மத்தியில் அரசின் மீதான நம்பிக்கையை அதிகரித்தது.

விஜயின் ஆட்சியில் தமிழகம் எதிர்கொண்டுள்ள மிக முக்கியமான மாற்றம் 'அரசியல் நாகரீகம்'. முந்தைய ஆட்சிக்காலங்களில் எதிர்க்கட்சியினரை இழிவுபடுத்துவதும், கைது செய்வதும் வாடிக்கையாக இருந்தது. ஆனால், முதல்வர் விஜய் 'அரசியல் என்பது கொள்கை மோதலே தவிர, தனிநபர் மோதல் அல்ல' என்பதைச் செயலில் காட்டினார்.

சட்டசபையில் எதிர்க்கட்சிகளின் ஆக்கபூர்வமான விமர்சனங்களுக்கு மதிப்பளிப்பதும், அவர்களது நல்ல ஆலோசனைகளை ஏற்றுக்கொள்வதும் ஒரு புதிய ஜனநாயக மரபைத் தோற்றுவித்துள்ளது. இது தமிழக மக்கள் நீண்டகாலமாக ஏங்கிக் கொண்டிருந்த ஒரு மாற்றமாகும். வன்முறை மற்றும் அருவருப்பான பேச்சுகள் நிறைந்த அரசியல் களத்தில், விஜயின் நிதானமான பேச்சு மற்றும் செயல்பாடு ஒரு கண்ணியமான அரசியல் சூழலை உருவாக்கியுள்ளது.

பொருளாதார ரீதியாகத் தமிழகத்தை ஒரு தன்னிறைவு பெற்ற மாநிலமாக மாற்ற விஜய் எடுத்து வரும் முயற்சிகள் பாராட்டுக்குரியவை. வெளிநாட்டு முதலீடுகளை ஈர்ப்பதற்காக அவர் அமைத்துள்ள 'விசேட தொழில் வளர்ச்சித் துறை', சர்வதேச நிறுவனங்களை தமிழகத்தின் தென் மாவட்டங்களை நோக்கி ஈர்க்கத் தொடங்கியுள்ளது.

இதன் மூலம் சென்னை போன்ற பெருநகரங்களில் மட்டுமே குவிந்திருந்த வேலைவாய்ப்புகள் தற்போது கிராமப்புற இளைஞர்களுக்கும் கிடைக்க வழிவகை செய்யப்பட்டுள்ளது. விவசாயிகளுக்கான நேரடி கொள்முதல் விலை உயர்வு மற்றும் மின்சார மானியங்கள் முறையாகச் சென்றடைவதை உறுதி செய்ததன் மூலம், கிராமப்புறப் பொருளாதாரம் புத்துயிர் பெற்றுள்ளது. இது வெறும் 'இலவச அரசியல்' அல்லாமல், 'வளர்ச்சி அரசியல்' என்பதை மெய்ப்பிக்கிறது.

பெண்கள் பாதுகாப்பு மற்றும் போதைப்பொருள் ஒழிப்பு ஆகியவற்றில் முதல்வர் விஜய் காட்டி வரும் தீவிரம் தமிழகத்தின் சமூகக் கட்டமைப்பை வலுப்படுத்தி வருகிறது. போதைப்பொருள் கடத்தல் மற்றும் விற்பனை செய்பவர்களுக்குக் கடுமையான தண்டனைகளை உறுதி செய்யும் சட்டத் திருத்தங்கள் கொண்டு வரப்பட்டுள்ளன.

பெண்களின் முன்னேற்றத்திற்காகக் கல்வி மற்றும் வேலைவாய்ப்பில் கூடுதல் முன்னுரிமை அளிப்பதுடன், அவர்கள் தற்சார்பு அடையத் தேவையான சிறுதொழில் கடன்களையும் எளிமையாக்கியுள்ளார். 'ஒவ்வொரு வீட்டிலும் ஒரு பட்டதாரி' என்ற அவரது கனவு நனவாகி வருவது தமிழகத்தின் அறிவுசார் சமூகத்தை அடுத்த கட்டத்திற்குக் கொண்டு செல்லும் என்பதில் சந்தேகமில்லை.

இருப்பினும், இந்த மாற்றமானது சவால்கள் இல்லாத ஒன்றல்ல. பல தசாப்தங்களாக வேரூன்றிய ஊழல் அமைப்புகளையும், அரசியல் எதிர்ப்புகளையும் எதிர்கொள்வது விஜய்க்கு ஒரு பெரும் சோதனையாகவே இருக்கும். ஆனால், அவருக்குப் பின்னால் இருக்கும் கோடிக்கணக்கான இளைஞர்களின் ஆதரவும், மாற்றத்தை விரும்பும் பொதுமக்களின் நம்பிக்கையும் அவருக்குப் பெரும் பலமாக உள்ளன.

'நிதானமான வேகம், நிலையான வளர்ச்சி' என்ற அவரது தாரக மந்திரம் தமிழகத்தை ஒரு பொற்காலத்தை நோக்கி அழைத்துச் செல்லும் என்று எதிர்பார்க்கப்படுகிறது. பழைய அரசியல் முறைகளை விடுத்து, தொழில்நுட்பத்தையும் மனிதாபிமானத்தையும் இணைத்து அவர் நடத்தி வரும் ஆட்சி உலகளவில் ஒரு சிறந்த நிர்வாக மாதிரியாகக் கவனிக்கப்படத் தொடங்கியுள்ளது.

தமிழகத்தில் ஏற்பட்டுள்ள இந்த வரலாற்று மாற்றம் என்பது ஜனநாயகத்தின் உண்மையான வெற்றியாகும். சினிமா நட்சத்திரமாகத் தனது வாழ்வைத் தொடங்கி, மக்கள் சேவகனாகத் தன்னை உருமாற்றிக் கொண்ட விஜயின் பயணம், இலட்சியம் கொண்ட எவரும் உயரிய நிலையை அடைய முடியும் என்பதற்குச் சான்றாகும்.

50 ஆண்டுகால திராவிட அரசியலுக்கு வைக்கப்பட்ட முற்றுப்புள்ளி என்பது ஒரு வீழ்ச்சி அல்ல, அதுவொரு புதிய விடியல். முதல்வர் விஜயின் தலைமையில் தமிழகம் கல்வியிலும், பொருளாதாரத்திலும், சமூக நீதியிலும் புதிய உச்சங்களைத் தொடும்.

இதுவெறும்ஆட்சிமாற்றம்மட்டுமல்ல, இதுஒருஇனத்தின்எழுச்சி, ஒருமாநிலத்தின்மறுமலர்ச்சி. இனிவரும்காலங்களில்தமிழகம்இந்தியாவின்முதன்மையானமாநிலமாகத்திகழ்வதைமுதல்வர்விஜயின்செயல்முறைதிட்டங்கள்உறுதிசெய்யும். தமிழகத்தின்இந்தப்புதியபயணம், அமைதி, வளம்மற்றும்சமத்துவத்தைநோக்கியநெடும்பயணமாகும்